ઇઝરાયેલની બહારના વિસ્તારમાં ભારે આગ ફાટી નીકળી, એકશનમાં નેતન્યાહુ, આંતરરાષ્ટ્રીય મદદ માંગી

ઇઝરાયલમાં જેરુસલેમની બહાર ભીષણ આગ લાગી છે. આગને કારણે પર્યાવરણને ભારે નુકસાન થયું છે, પરંતુ સામાન્ય જનજીવન પણ ખરાબ રીતે પ્રભાવિત થયું છે. આ આગ એટલી ભયંકર છે કે તેને ઓલવવા માટે સેંકડો અગ્નિશામકો, હેલિકોપ્ટર અને અન્ય કટોકટી સંસાધનોનો ઉપયોગ કરવામાં આવ્યો છે. આગને કારણે હજારો નાગરિકોને પોતાના ઘર ખાલી કરવા પડ્યા છે. અધિકારીઓએ આ આગને દેશના ઇતિહાસની સૌથી મોટી આગ ગણાવી છે. ભારે પવનને કારણે આગ ઝડપથી ફેલાઈ રહી છે.

ઇઝરાયલે આંતરરાષ્ટ્રીય સમુદાય પાસેથી મદદ માંગી

આગની તીવ્રતાનો અંદાજ એ વાત પરથી લગાવી શકાય છે કે ઇઝરાયલે આંતરરાષ્ટ્રીય સમુદાય પાસેથી મદદ માંગી છે. યુક્રેને કહ્યું કે તે જંગલની આગ સામે લડવા માટે એક વિમાન મોકલશે. સ્પેન, ફ્રાન્સ, રોમાનિયા, ક્રોએશિયા અને ઇટાલીએ પણ કહ્યું છે કે તેઓ વિમાન મોકલશે. ઇઝરાયલની ઇમરજન્સી મેડિકલ સર્વિસે જણાવ્યું હતું કે તેણે અત્યાર સુધીમાં 23 લોકોની સારવાર કરી છે, જેમાંથી 13 લોકોને દાઝી જવા અને ધુમાડામાં શ્વાસ લેવાથી હોસ્પિટલમાં દાખલ કરવામાં આવ્યા હતા.

એક વ્યક્તિની ધરપકડ

આગને કારણે, અધિકારીઓએ તેલ અવીવથી જેરુસલેમને જોડતો મુખ્ય હાઇવે રૂટ 1 બંધ કરી દીધો છે. રસ્તાઓ પર આગની જ્વાળાઓ પણ દેખાય છે. શહેરના દક્ષિણ ભાગમાં ખેતરમાં આગ લગાડવાનો પ્રયાસ કરતા પૂર્વ જેરુસલેમના એક રહેવાસીની પોલીસે ધરપકડ કરી હતી.

ભારે પવન મુશ્કેલી ઊભી કરે છે

ઇઝરાયલી સરકારે આગને કાબુમાં લેવા માટે કટોકટી સેવાઓ સક્રિય કરી છે અને નાગરિકોને સતર્ક રહેવા અપીલ કરી છે. કેટલાક વિસ્તારોમાં સેનાની મદદ પણ લેવામાં આવી રહી છે. પવન વધુ તીવ્ર બનવાની ધારણા હોવાથી આગ વધુ વિકરાળ બની શકે છે. ઇઝરાયલના વડા પ્રધાન બેન્જામિન નેતન્યાહૂએ કહ્યું છે કે જંગલની આગ જેરુસલેમ સુધી પહોંચી શકે છે.