ઇન્ડોનેશિયાના પશ્ચિમ સુમાત્રા પ્રાંતમાં મંગળવારે એક દુ:ખદ માર્ગ અકસ્માત થયો. ૩૪ મુસાફરોને લઈ જતી બસ ટેકરી પરથી નીચે પલટી જતાં આ અકસ્માત સર્જાયો હતો. બસ નિયંત્રણ બહાર જઈને પલટી જતાં ઓછામાં ઓછા 12 મુસાફરોના મોત થયા હતા અને ઘણા લોકો ઘાયલ થયા હતા. પોલીસે આ અકસ્માત અંગે માહિતી આપી છે.
પોલીસ કરી રહી છે તપાસ
પશ્ચિમ સુમાત્રા ટ્રાફિક પોલીસના ડિરેક્ટર રેઝા ચૈરુલ અકબર સિદિકે જણાવ્યું હતું કે બસ ઉત્તર સુમાત્રા પ્રાંતના મેદાનથી ઇન્ડોનેશિયાની રાજધાની જકાર્તા જઈ રહી હતી. દરમિયાન, પશ્ચિમ સુમાત્રાના પડંગ શહેરમાં બસ ટર્મિનલ પાસે તેના બ્રેક કદાચ ખરાબ થઈ ગયા. તેમણે કહ્યું કે પોલીસ અકસ્માતના કારણની તપાસ કરી રહી છે.
અકસ્માતમાં બચી ગયેલા લોકોએ શું કહ્યું?
અકસ્માતમાં બચી ગયેલા લોકોએ અધિકારીઓને જણાવ્યું હતું કે બ્રેક ફેલ થઈ ગયા પછી પડંગમાં ઘણી ઢાળવાળી ટેકરીઓવાળા વિસ્તારમાં ડ્રાઇવરે વાહન પરનો કાબુ ગુમાવ્યો હતો. તેમણે કહ્યું કે 23 ઘાયલો સહિત તમામ પીડિતોને નજીકની બે હોસ્પિટલોમાં ખસેડવામાં આવ્યા છે. સિદ્દીકે જણાવ્યું હતું કે ૧૩ ઘાયલોને ગંભીર ઈજાઓ થઈ છે અને તેમની સારવાર ચાલી રહી છે. ડ્રાઇવર સહિત ઘણા લોકોની હાલત ગંભીર છે.
