પાકિસ્તાનમાં લાહોર નજીક એક ટ્રેન પાટા પરથી ઉતરી ગઈ. આ ઘટનામાં ઓછામાં ઓછા 30 મુસાફરો ઘાયલ થયા છે. પાકિસ્તાન રેલ્વે અધિકારીઓએ શનિવારે જણાવ્યું હતું કે લાહોર નજીક એક ટ્રેનના અનેક ડબ્બા પાટા પરથી ઉતરી ગયા હતા. લાહોરથી રાવલપિંડી જતી ઇસ્લામાબાદ એક્સપ્રેસ શુક્રવારે સાંજે લાહોરથી લગભગ 50 કિમી દૂર શેખુપુરાના કાલા શાહ કાકુ ખાતે પાટા પરથી ઉતરી ગઈ હતી. “શેખુપુરામાં ટ્રેનના ઓછામાં ઓછા 10 ડબ્બા પાટા પરથી ઉતરી ગયા હતા, જેમાં લગભગ 30 મુસાફરો ઘાયલ થયા હતા. તેમાંથી ત્રણની હાલત ગંભીર છે,” પાકિસ્તાન રેલ્વેએ શુક્રવારે મોડી રાત્રે એક નિવેદનમાં જણાવ્યું હતું.
બચાવ કાર્યકરો ઘટનાસ્થળે દોડી ગયા હતા અને ઘાયલોને નજીકની હોસ્પિટલમાં ખસેડ્યા હતા. અધિકારીઓએ જણાવ્યું હતું કે કોચમાં ફસાયેલા કેટલાક મુસાફરોને બચાવવાના પ્રયાસો ચાલુ છે. રેલવેએ જણાવ્યું હતું કે અત્યાર સુધી કોઈ જાનહાનિના અહેવાલ નથી. તેણે વધુમાં જણાવ્યું હતું કે લાહોર રેલ્વે સ્ટેશનથી રવાના થયાના અડધા કલાક પછી ટ્રેનના કોચ પાટા પરથી ઉતરી ગયા હતા.
રેલમંત્રીએ 7 દિવસમાં રિપોર્ટ માંગ્યો
રેલ્વે મંત્રી મુહમ્મદ હનીફ અબ્બાસીએ ટ્રેન પાટા પરથી ઉતરી જવાની ઘટનાની નોંધ લીધી અને રેલ્વેના સીઈઓ અને વિભાગીય અધિક્ષકને ઘટનાસ્થળની મુલાકાત લેવા અને પરિસ્થિતિનું નિરીક્ષણ કરવા નિર્દેશ આપ્યો. તેમણે આ મામલાની તપાસ શરૂ કરવા અને સાત દિવસમાં તપાસ રિપોર્ટ સુપરત કરવાનો પણ નિર્દેશ આપ્યો.
શાહબાઝ શરીફે દુઃખ વ્યક્ત કર્યું
પ્રધાનમંત્રી શાહબાઝ શરીફે આ ઘટના પર દુઃખ વ્યક્ત કર્યું અને ઘાયલો માટે પ્રાર્થના કરી. તેમણે બચાવ કામગીરી ઝડપી બનાવવા અને ઘાયલોને પ્રાથમિકતાના ધોરણે તબીબી સારવાર આપવાનો પણ આદેશ આપ્યો.
એક હજારથી વધુ લોકોનો બચાવ
સ્થાનિક મીડિયા અનુસાર, અકસ્માત બાદ તાત્કાલિક ઇમરજન્સી રિસ્પોન્સ ટીમો ઘટનાસ્થળે પહોંચી ગઈ હતી અને બચાવ કામગીરી શરૂ કરી હતી. ઘાયલ મુસાફરોને ઘટનાસ્થળે પ્રાથમિક સારવાર આપવામાં આવી હતી, જ્યારે ગંભીર રીતે ઘાયલોને સારવાર માટે નજીકની હોસ્પિટલોમાં લઈ જવામાં આવ્યા હતા. અધિકારીઓએ અસરગ્રસ્ત ટ્રેક સાફ કરવા અને પીડિતોને મદદ કરવા માટે ઝડપથી કામ કર્યું હતું. રાહત અને બચાવ ટીમોએ એક હજારથી વધુ લોકોને બચાવ્યા હતા.
