અમદાવાદ શહેર ક્રાઈમ બ્રાન્ચે મંગળવારે રાજસ્થાનના અજમેરમાં ગયા મહિને થયેલી ટ્રિપલ મર્ડર કેસમાં ત્રણ લોકોની ધરપકડ કરી હતી. હત્યા બાદ આરોપીઓ ધરપકડથી બચવા માટે અજમેરથી ભાગી ગયા હતા. બાતમી મળતાં ક્રાઈમ બ્રાન્ચે ત્રણ વોન્ટેડ વ્યક્તિઓની અટકાયત કરી હતી.
આરોપીઓને રાજસ્થાન પોલીસને સોંપવામાં આવ્યા
ધરપકડ કરાયેલા વ્યક્તિઓની ઓળખ સલમાન અબ્દુલઅલી કુરેશી (29 વર્ષ), અલ્લારખા અબ્દુલઅલી કુરેશી (25 વર્ષ) અને અવેશ અબ્દુલઅલી કુરેશી (20 વર્ષ) તરીકે થઈ છે, જે બધા અજમેરના દિગ્ગી બજારના શૌર્યવાન મોહલ્લાના રહેવાસી છે. બાદમાં ત્રણેયને વધુ તપાસ અને કાનૂની કાર્યવાહી માટે રામગંજ પોલીસને સોંપવામાં આવ્યા હતા.
૧૫ જુલાઈના રોજ હિંસક અથડામણ થઈ હતી
માહિતી અનુસાર, 15 જુલાઈના રોજ, રામગંજ પોલીસ સ્ટેશન હેઠળના ખાનપુરામાં મુસ્લિમ સમુદાયના બે જૂથો વચ્ચે હિંસક અથડામણ થઈ હતી. પાકીઝા મીટ શોપમાં જૂની દુશ્મનાવટને કારણે આ વિવાદ શરૂ થયો હોવાનું કહેવાય છે. બંને પક્ષોએ તીક્ષ્ણ હથિયારોનો ઉપયોગ કર્યો હતો. પ્રારંભિક તપાસમાં જાણવા મળ્યું છે કે હત્યાઓ હરીફ જૂથો વચ્ચેની જૂની દુશ્મનાવટને કારણે થઈ હતી.
પોલીસે જણાવ્યું હતું કે અજમેરમાં મીટ શોપ એસોસિએશનના સોશિયલ મીડિયા ગ્રુપમાં મેસેજ પોસ્ટ કરવાને લઈને આરોપી અને મૃતક વચ્ચે ઝઘડો થયો હતો. વિવાદ વધતાં બંને પક્ષના 20-25 લોકો વચ્ચે મારામારી થઈ હતી. આ ઘટનામાં, બદલાની ભાવનાથી તીક્ષ્ણ હથિયારોથી હુમલો કરીને બે લોકોની હત્યા કરવામાં આવી હતી અને એક વ્યક્તિને વાહને કચડી નાખ્યો હતો. આ કેસમાં, અબ્દુલ કુરેશી અને તેના પાંચ પુત્રો હત્યા કેસમાં આરોપી છે. હત્યામાં સંડોવાયેલા પાંચ પુત્રોમાંથી ત્રણની ક્રાઈમ બ્રાન્ચ દ્વારા ધરપકડ કરવામાં આવી છે. અગાઉ, બે પુત્રોની ધરપકડ કરવામાં આવી છે. આરોપીઓ અમદાવાદના બાપુનગર વિસ્તારમાં તેમના સાસરિયાના ઘરમાં છુપાયેલા હતા.
