પ્રખ્યાત બાંગ્લાદેશી અભિનેત્રી નુસરત ફારિયાની આંતરરાષ્ટ્રીય એરપોર્ટ પરથી ધરપકડ કરવામાં આવી છે. નુસરત શેખ ‘મુજીબ ધ મેકિંગ ઓફ અ નેશન’ નામની બાયોપિકમાં શેખ હસીનાની ભૂમિકા ભજવીને પ્રખ્યાત થઈ હતી. ૩૧ વર્ષીય નુસરતને ઢાકાના હઝરત શાહજલાલ આંતરરાષ્ટ્રીય વિમાનમથક પર ત્યારે ધરપકડ કરવામાં આવી હતી જ્યારે તે થાઇલેન્ડ જતી ફ્લાઇટમાં ચઢવા જઈ રહી હતી.
વાસ્તવમાં તેનું નામ હત્યાના પ્રયાસના કેસમાં સામે આવ્યું છે. ગયા વર્ષે જુલાઈમાં હસીના વિરુદ્ધ જાહેર આંદોલન દરમિયાન તેમની સામે આ કેસ નોંધવામાં આવ્યો હતો.
જામીન માટે કોર્ટમાં અપીલ
ફારિયાના વકીલે જામીન માટે કોર્ટનો સંપર્ક કર્યો છે અને કોર્ટ 22 મેના રોજ જામીન અરજી પર સુનાવણી કરશે. આ કેસ ગયા વર્ષે થયેલા વિરોધ પ્રદર્શનો સાથે જોડાયેલો છે જેના કારણે શેખ હસીનાની આગેવાની હેઠળની સરકારને હાંકી કાઢવામાં આવી હતી અને બાંગ્લાદેશમાં વચગાળાની સરકારની સ્થાપના થઈ હતી. અભિનેત્રીના નામે વિદ્યાર્થીની હત્યાનો મામલો સામે આવ્યો છે.
મીડિયા રિપોર્ટ્સમાં કહેવામાં આવ્યું છે કે અભિનેત્રી થાઇલેન્ડ જવાની હતી પરંતુ ઢાકા એરપોર્ટ પર તેમને રોકવામાં આવી હતી.
શેખ હસીના પર એક ફિલ્મ બનાવી
ફારિયા પીઢ ફિલ્મ નિર્માતા શ્યામ બેનેગલ દ્વારા દિગ્દર્શિત શેખ મુજીબુર રહેમાન પર બનેલી ફિલ્મ ‘મુજીબ ધ મેકિંગ ઓફ અ નેશન’માં ભૂતપૂર્વ બાંગ્લાદેશી વડા પ્રધાન શેખ હસીનાની ભૂમિકા ભજવવા માટે પ્રખ્યાત છે. આ ફિલ્મનું નિર્માણ બાંગ્લાદેશ અને ભારત દ્વારા સંયુક્ત રીતે કરવામાં આવ્યું હતું અને તેમાં આરિફિન શુવો મુખ્ય ભૂમિકામાં હતા.
