Rameshwaram Cafe Blast: NIA એ બેંગલુરુમાં રામેશ્વરમ કાફે બ્લાસ્ટ સાથે સંબંધિત કેસની તપાસના ભાગરૂપે મંગળવારે અનેક રાજ્યોમાં દરોડા પાડ્યા હતા. 1 માર્ચના રોજ કેફેમાં થયેલા વિસ્ફોટમાં ઘણા ગ્રાહકો અને સ્ટાફ ઘાયલ થયા હતા, જેમાંથી કેટલાક ગંભીર રીતે ઘાયલ થયા હતા. વિસ્ફોટથી કાફેને ભારે નુકસાન થયું હતું.
વધુ વિગતો શેર કર્યા વિના, એનઆઈએના એક વરિષ્ઠ અધિકારીએ જણાવ્યું હતું કે ઘણા રાજ્યોમાં વિવિધ સ્થળોએ દરોડા પાડવામાં આવ્યા હતા. તેમણે કહ્યું કે ગુનામાં સંડોવાયેલા લોકો સાથે કેટલાક શંકાસ્પદ લોકોની કડીઓની માહિતીના આધારે દરોડા પાડવામાં આવ્યા હતા. અધિકારીઓએ જણાવ્યું કે બેંગલુરુમાં કુમારસ્વામી લેઆઉટ અને બનાશંકરીમાં પણ દરોડા પાડવામાં આવ્યા હતા.
NIA અધિકારીઓએ આંધ્રપ્રદેશના રાયદુર્ગમ શહેરના નાગુલા બાઉલી વિસ્તારમાં એક ઘરની તલાશી લીધી હતી. પૂછપરછ માટે એક યુવકની અટકાયત કરવામાં આવી છે. તે જ સમયે, NIAની બે ટીમોએ ચેન્નાઈના સાંઈ બાબા કોલોનીમાં નારાયણગુરુ સ્ટ્રીટ સ્થિત બે ડોક્ટરોના ઘરે દરોડા પાડ્યા હતા. કોઇ અનિચ્છનીય બનાવ ન બને તે માટે બંને આવાસની સામે સ્થાનિક પોલીસનો ચુસ્ત બંદોબસ્ત ગોઠવી દેવામાં આવ્યો હતો. 3 માર્ચે તપાસ સંભાળનાર એજન્સીએ 12 એપ્રિલે આ કેસના મુખ્ય આરોપી અબ્દુલ મતીન અહેમદ તાહા સહિત બે મુખ્ય આરોપીઓની ધરપકડ કરી હતી.
તાહા અને અન્ય આરોપી મુસાવીર હુસૈન શાજીબ, જેમણે કેફેમાં IED પ્લાન્ટ કર્યો હતો, તેમની કોલકાતા નજીક એક લોજમાંથી ધરપકડ કરવામાં આવી હતી, જ્યાં તેઓ નકલી ઓળખ સાથે રહેતા હતા. બંને શિમોગા સ્થિત ઈસ્લામિક સ્ટેટ મોડ્યુલના સભ્યો છે. અધિકારીઓએ જણાવ્યું કે આ જ મોડ્યુલના સભ્ય શારિકે 19 નવેમ્બર, 2022ના રોજ મેંગલુરુમાં વિસ્ફોટને અંજામ આપ્યો હતો.
