N Chandrababu Naidu: આંધ્રપ્રદેશના મુખ્યમંત્રી તરીકે શપથ લેવાના એક દિવસ પહેલા, તેલુગુ દેશમ પાર્ટી (ટીડીપી)ના વડા ચંદ્રબાબુ નાયડુએ મંગળવારે જાહેરાત કરી હતી કે અમરાવતી રાજ્યની એકમાત્ર રાજધાની હશે. નાયડુ ટીડીપી, ભાજપ અને જનસેનાના ધારાસભ્યોની સંયુક્ત બેઠકને સંબોધિત કરી રહ્યા હતા. બેઠકમાં તેમને સર્વસંમતિથી આંધ્ર પ્રદેશ વિધાનસભામાં NDAના નેતા તરીકે ચૂંટવામાં આવ્યા હતા.
આ દરમિયાન તેમણે કહ્યું કે અમારી સરકારમાં ત્રણ રાજધાનીઓની આડમાં કોઈ રમત નહીં ચાલે. આપણી રાજધાની અમરાવતી છે. અમરાવતી રાજધાની છે ચંદ્રબાબુ નાયડુ રાજ્યના વિભાજન પછી પ્રથમ મુખ્યમંત્રી બન્યા. તેઓ 2014 થી 2019 સુધી મુખ્યમંત્રી હતા. નાયડુએ અમરાવતીને રાજધાની બનાવવાનો વિચાર રજૂ કર્યો હતો.
જો કે, નાયડુના વિચારને આંચકો લાગ્યો જ્યારે તેમણે 2019 માં સત્તા ગુમાવી દીધી અને વાયએસ જગન મોહન રેડ્ડીની આગેવાની હેઠળની YSRCP એ જંગી જીત મેળવી. રેડ્ડીએ ત્યારપછી અમરાવતી શહેરની યોજનાઓને પડતી મૂકી અને ત્રણ રાજધાનીઓનો નવો વિચાર આગળ ધપાવ્યો, જેને નાયડુએ હવે એક જ રાજધાની રાખવાના નિર્ણય સાથે બદલ્યો છે.
આંધ્રપ્રદેશમાં તાજેતરની વિધાનસભા ચૂંટણીમાં ટીડીપી, ભાજપ અને જનસેનાના ગઠબંધનનો એકતરફી વિજય થયો હતો. વિધાનસભા ચૂંટણીમાં NDA ગઠબંધનને 164 બેઠકો મળી હતી. જ્યારે લોકસભા ચૂંટણીમાં તેણે જંગી બહુમતી સાથે 21 બેઠકો પર ભવ્ય વિજય મેળવ્યો હતો. આ આદેશથી અમરાવતીને રાજધાની બનાવવાની યોજનામાં નવો પ્રાણ ફૂંકાયો છે.
