ભારતના આનંદ કુમાર વેલકુમારે સ્કેટિંગમાં એક નવો ઇતિહાસ રચ્યો છે. 22 વર્ષીય આનંદ કુમારે ચીનમાં યોજાયેલી સ્પીડ સ્કેટિંગ વર્લ્ડ ચેમ્પિયનશિપમાં ગોલ્ડ મેડલ જીત્યો. આ રીતે, તે સ્કેટિંગ વર્લ્ડ ચેમ્પિયનશિપમાં ગોલ્ડ મેડલ જીતનાર પ્રથમ ભારતીય બન્યો છે. તેણે પુરુષોની સિનિયર 1000 મીટર સ્પ્રિન્ટ ઇવેન્ટમાં પ્રથમ સ્થાન મેળવ્યું. વેલકુમારે 1:24.924 સેકન્ડના સમય સાથે ફિનિશ લાઇન પાર કરી અને ભારતના પ્રથમ વર્લ્ડ ચેમ્પિયન સ્કેટર બન્યા.
આ ઐતિહાસિક જીતના એક દિવસ પહેલા, વેલકુમારે 500 મીટર સ્પ્રિન્ટમાં 43.072 સેકન્ડનો સમય લઈને બ્રોન્ઝ મેડલ જીત્યો હતો, જે વર્લ્ડ ચેમ્પિયનશિપમાં ભારતનો પહેલો સિનિયર મેડલ હતો. તે જ સાંજે, ભારત માટે બીજા સારા સમાચાર આવ્યા જ્યારે ક્રિશ શર્માએ જુનિયર કેટેગરીમાં 1000 મીટર સ્પ્રિન્ટમાં ગોલ્ડ મેડલ જીત્યો. આ રીતે, ભારતે આ ચેમ્પિયનશિપમાં ડબલ ગોલ્ડ જીતીને એક નવો અધ્યાય લખ્યો.
વેલકુમારે ઇતિહાસ રચ્યો
વેલકુમારે અગાઉ પણ ભારતીય સ્કેટિંગને ગૌરવ અપાવ્યું છે. આ વર્ષની શરૂઆતમાં, તેમણે ચીનના ચેંગડુમાં આયોજિત વર્લ્ડ ગેમ્સમાં 1000 મીટર સ્પ્રિન્ટમાં બ્રોન્ઝ મેડલ જીત્યો હતો. રોલર સ્પોર્ટ્સમાં આ ભારતનો પહેલો મેડલ હતો. આ સતત ઐતિહાસિક સફળતાઓએ માત્ર વેલકુમારને જ નહીં પરંતુ સમગ્ર ભારતીય સ્કેટિંગને વૈશ્વિક નકશા પર એક નવી ઓળખ આપી છે.
Proud of Anandkumar Velkumar for winning the Gold at the Senior Men’s 1000m Sprint in the Speed Skating World Championships 2025. His grit, speed and spirit have made him India’s first World Champion in skating. His accomplishment will inspire countless youngsters.… pic.twitter.com/uewup1bGir
— Narendra Modi (@narendramodi) September 16, 2025
પીએમ મોદીએ અભિનંદન પાઠવ્યા
પ્રધાનમંત્રી નરેન્દ્ર મોદીએ પણ આનંદ કુમારની સિદ્ધિ પર ગર્વ વ્યક્ત કર્યો. તેમણે પોસ્ટ પર લખ્યું – સ્પીડ સ્કેટિંગ વર્લ્ડ ચેમ્પિયનશિપ 2025 માં સિનિયર પુરુષોની 1000 મીટર સ્પ્રિન્ટમાં ગોલ્ડ મેડલ જીતવા બદલ આનંદ કુમાર વેલકુમાર પર ગર્વ છે. તેમના ધૈર્ય, ગતિ અને જુસ્સાએ તેમને ભારતના પ્રથમ વિશ્વ ચેમ્પિયન બનાવ્યા છે. તેમની સિદ્ધિ અસંખ્ય યુવાનોને પ્રેરણા આપશે. તેમને અભિનંદન અને તેમના ભવિષ્યના તમામ પ્રયાસો માટે શુભેચ્છાઓ.
