ઇન્ડિયન પ્રીમિયર લીગ (IPL) 2025નો બીજો તબક્કો 17 મેથી શરૂ થવા જઈ રહ્યો છે. જ્યાં આ સિઝનની બાકીની 16 મેચ રમાશે. આ પહેલા, રોયલ ચેલેન્જર્સ બેંગ્લોર (RCB) માટે એક મોટા સારા સમાચાર છે. હિન્દુસ્તાન ટાઈમ્સના અહેવાલ મુજબ, ઓસ્ટ્રેલિયન ફાસ્ટ બોલર જોશ હેઝલવુડ બાકીની મેચ રમવા માટે ભારત આવી રહ્યા છે.
હેઝલવુડ ટૂંક સમયમાં ભારત રવાના થશે
રિપોર્ટ અનુસાર, હેઝલવુડ ટૂંક સમયમાં ભારત રવાના થશે અને RCB ટીમમાં જોડાશે. જોકે, તેમના આગમનની ચોક્કસ તારીખ હજુ નક્કી કરવામાં આવી નથી. ભારત-પાકિસ્તાન સરહદ પર તણાવને કારણે IPL એક અઠવાડિયા માટે મુલતવી રાખ્યા બાદ, અન્ય ટોચના ઓસ્ટ્રેલિયન ક્રિકેટરોની જેમ હેઝલવુડ પણ પોતાના દેશ પરત ફર્યા હતા. હવે જ્યારે BCCI એ નવા સમયપત્રક સાથે ટુર્નામેન્ટ ફરી શરૂ કરવાની જાહેરાત કરી છે, ત્યારે ઓસ્ટ્રેલિયા અને દક્ષિણ આફ્રિકાના ખેલાડીઓની ભાગીદારી અંગે શંકાઓ યથાવત છે કારણ કે બંને દેશોની ટીમો વર્લ્ડ ટેસ્ટ ચેમ્પિયનશિપ (WTC) ફાઇનલ માટે તૈયારી કરવા જઈ રહી છે.
આ સિઝનમાં હેઝલવુડ શાનદાર ફોર્મમાં છે
આ સિઝનમાં RCBના શાનદાર પ્રદર્શનમાં હેઝલવુડે મુખ્ય ભૂમિકા ભજવી છે. તેણે 10 મેચમાં 18 વિકેટ લીધી છે. જોકે, ખભાની ઇજાને કારણે તે ટીમની છેલ્લી લીગ મેચ રમી શક્યો ન હતો. પરંતુ ઓસ્ટ્રેલિયાની WTC ફાઇનલ ટીમમાં તેની પસંદગી થતાં તેની ફિટનેસ અંગેની શંકાઓ દૂર થઈ ગઈ.
ક્રિકેટ ઓસ્ટ્રેલિયાએ તેના ખેલાડીઓની વાપસી પર આ નિવેદન આપ્યું
તેમની વાપસીથી આરસીબીનું મનોબળ ચોક્કસપણે વધશે કારણ કે ટીમના કેપ્ટન રજત પાટીદારની ઈજાને કારણે ભાગીદારી શંકાસ્પદ છે. અગાઉ, ક્રિકેટ ઓસ્ટ્રેલિયા (CA) એ એક નિવેદન જારી કરીને કહ્યું હતું કે તેઓ તેમના ખેલાડીઓના નિર્ણયોને સમર્થન આપશે, પછી ભલે તેઓ ભારત પાછા ફરે કે ન આવે. ઓસ્ટ્રેલિયન બોર્ડે પોતાના નિવેદનમાં કહ્યું, “17 મેથી IPL ફરી શરૂ થવાની જાહેરાત બાદ, ક્રિકેટ ઓસ્ટ્રેલિયા ભારત પાછા ફરવાનો કે ન આવવાનો નિર્ણય લેનારા ખેલાડીઓના નિર્ણયોનું સન્માન કરશે.”
હેઝલવુડ પહેલી મેચ નહીં રમે
IPL હવે 17 મેથી ફરી શરૂ થવા જઈ રહી છે અને RCBનો પહેલો મેચ કોલકાતા નાઈટ રાઈડર્સ (KKR) સામે થશે. હેઝલવુડની વાપસીની તારીખ હજુ નક્કી થઈ નથી, તેથી આ મેચમાં તેનું રમવું શંકાસ્પદ છે.આ પહેલા વેસ્ટ ઈન્ડિઝ અને ઈંગ્લેન્ડના ખેલાડીઓ ભારત પહોંચી ચૂક્યા છે.
શનિવારની મેચ પહેલા લિયામ લિવિંગસ્ટોન અને રોમારિયો શેફર્ડ RCB સાથે જોડાયા છે. શેફર્ડની સાથે, વેસ્ટ ઇન્ડીઝના અન્ય ખેલાડીઓ આન્દ્રે રસેલ, સુનીલ નારાયણ અને કેકેઆરના માર્ગદર્શક ડ્વેન બ્રાવો પણ ભારત પહોંચ્યા.
શેફર્ડ 29 મેથી શરૂ થનારા ઇંગ્લેન્ડ પ્રવાસ માટે વેસ્ટ ઇન્ડીઝની ODI ટીમનો પણ ભાગ છે. આ શ્રેણી IPL 2025 પ્લેઓફ સાથે ટકરાઈ રહી છે. ક્રિકેટ વેસ્ટ ઇન્ડીઝે 29 મે પછી આઇપીએલમાં શેફર્ડની ભાગીદારી અંગે હજુ સુધી કોઈ સ્પષ્ટતા આપી નથી.
ઇંગ્લેન્ડના લિયામ લિવિંગસ્ટોન આરસીબીમાં જોડાયા છે, જ્યારે જેકબ બેથેલ પહેલાથી જ ટીમમાં પાછા ફર્યા છે. બેથેલને કેરેબિયન ટીમ સામે ઇંગ્લેન્ડની આગામી ઘરઆંગણે રમાનારી વ્હાઇટ-બોલ શ્રેણીમાં સામેલ કરવામાં આવ્યો છે, જ્યારે લિવિંગસ્ટોનને ODI અને T20 બંને ટીમોમાંથી બહાર કરવામાં આવ્યો છે.
