શુક્રવારે ચંદીગઢ પ્રશાસને સાયરન વગાડીને હવાઈ હુમલાની ચેતવણી આપી હતી. વહીવટીતંત્રે લોકોને પોતાના ઘરોમાં રહેવાની અપીલ કરી. ચંદીગઢ પ્રશાસન દ્વારા જારી કરાયેલા એક સત્તાવાર નિવેદનમાં કહેવામાં આવ્યું છે કે, “વાયુસેના સ્ટેશન તરફથી સંભવિત હુમલાની ચેતવણી મળી છે. સાયરન વગાડવામાં આવી રહ્યા છે. દરેકને ઘરની અંદર રહેવા અને બાલ્કનીમાં ન આવવાની સલાહ આપવામાં આવી છે.” ચંદીગઢ પંજાબ અને હરિયાણાની સંયુક્ત રાજધાની છે.
લોકોને ઘરમાં રહેવાની અપીલ
ગુરુવારે રાત્રે ચંદીગઢમાં પણ આવા જ સાયરન વાગ્યા હતા. ભારતે ગઈકાલે રાત્રે જમ્મુ, પઠાણકોટ, ઉધમપુર અને અન્ય કેટલાક સ્થળોએ લશ્કરી સ્થાપનો પર મિસાઈલ અને ડ્રોન હુમલા કરવાના પાકિસ્તાનના પ્રયાસોને નિષ્ફળ બનાવ્યા. આ ઘટનાક્રમ સાથે, બંને દેશો વચ્ચે લશ્કરી સંઘર્ષ વધવાનો ભય છે. પંજાબના મોહાલી જિલ્લા વહીવટીતંત્રે ચંદીગઢની સરહદે રહેતા લોકોને પણ ઘરમાં રહેવાની સલાહ આપી છે.
બારીઓ અને અરીસાઓ પાસે ન જાઓ
મોહાલી વહીવટીતંત્ર દ્વારા જારી કરાયેલા સંદેશમાં કહેવામાં આવ્યું છે કે, “ચંદીગઢના કેટલાક વિસ્તારોમાં એલર્ટ જારી કરવામાં આવ્યું છે. અમે મોહાલીના સરહદી ક્ષેત્રમાં રહેતા લોકોને ઘરની અંદર રહેવા અને બારીઓ અને કાચની નજીક જવાનું ટાળવાની સલાહ આપીએ છીએ.” સંરક્ષણ મંત્રાલયે એક નિવેદનમાં જણાવ્યું હતું કે 7-8 મેની રાત્રે, પાકિસ્તાની સેનાએ અવંતિપુરા, શ્રીનગર, જમ્મુ, પઠાણકોટ, અમૃતસર, કપૂરથલા, જલંધર, લુધિયાણા, આદમપુર, ભટિંડા, ચંદીગઢ, નાલ, ફલોદી, ઉત્તરલાઈ અને ભૂજને નિશાન બનાવવાનો પ્રયાસ કર્યો હતો.
આ ઘટનાક્રમ એવા સમયે આવ્યો છે જ્યારે ભારતીય સશસ્ત્ર દળોએ બુધવારે 22 એપ્રિલના રોજ પહેલગામમાં થયેલા આતંકવાદી હુમલાના બદલામાં ‘ઓપરેશન સિંદૂર’ હેઠળ પાકિસ્તાન અધિકૃત કાશ્મીર (PoK) માં નવ આતંકવાદી લોન્ચ પેડ પર સચોટ મિસાઇલ હુમલા કર્યા હતા.
