આ વર્ષે બોર્ડર ગાવસ્કર ટ્રોફીમાં 1-3થી મળેલી હાર અને શ્રેણી દરમિયાન ડ્રેસિંગ રૂમની વાતચીત લીક થયા બાદ ભારતીય ક્રિકેટ કંટ્રોલ બોર્ડ (BCCI)એ મોટી કાર્યવાહી કરી છે. બોર્ડે BCCIના સહાયક કોચ અભિષેક નાયરને હટાવી દીધા છે, તેમ છતાં તેમનો કાર્યકાળ 8 મહિના પહેલા જ શરૂ થયો હતો. તમને જણાવી દઈએ કે BGT સિરીઝ હાર્યા બાદ BCCIએ એક રિવ્યુ મીટિંગ કરી હતી, જેમાં ટીમ મેનેજમેન્ટના એક સભ્યએ ફરિયાદ કરી હતી કે ડ્રેસિંગ રૂમના સમાચાર બહાર જઈ રહ્યા છે.
સમાચાર અનુસાર, સહાયક કોચ અભિષેક નાયર સિવાય ભારતીય ટીમના ફિલ્ડિંગ કોચ ટી દિલીપ અને ટ્રેનર સોહમ દેસાઈને પણ બરતરફ કરવામાં આવ્યા છે. રિપોર્ટમાં સૂત્રોના હવાલાથી કહેવામાં આવ્યું છે કે નાયરની જગ્યાએ કોઈની નિમણૂક કરવામાં આવશે નહીં કારણ કે સિતાંશુ કોટક ટીમ ઈન્ડિયા સાથે બેટિંગ કોચ તરીકે પહેલાથી જ જોડાયેલા છે. દિલીપનું કામ આસિસ્ટન્ટ કોચ રેયાન ટેન ડેસ્કેટ દ્વારા જોવામાં આવશે.
ટ્રેનર સોહમ દેસાઈના સ્થાને એડ્રિયન લી રૂને લેવામાં આવશે, જે હાલમાં આઈપીએલમાં પંજાબ કિંગ્સ સાથે સંકળાયેલા છે. તે 2008 થી 2019 સુધી KKR ટીમ સાથે પણ હતો, તેણે 2002 થી 2003 સુધી ટીમ ઈન્ડિયા સાથે પણ કામ કર્યું હતું. તેણે BCCI સાથે કરાર કર્યો છે.
BGT શ્રેણી વિવાદોથી ઘેરાયેલી હતી
ભારતીય ટીમ બોર્ડર ગાવસ્કર ટ્રોફી 1-3થી હારી ગઈ હતી, આ શ્રેણીમાં અશ્વિને અચાનક નિવૃત્તિ લીધી હતી. રોહિત શર્માએ પોતાને સિડની ટેસ્ટમાંથી બહાર કરી દીધો હતો, ત્યારબાદ એવી અટકળો લગાવવામાં આવી હતી કે ટીમમાં બધુ બરાબર નથી. ભારતીય ડ્રેસિંગ રૂમમાંથી પણ સમાચાર બહાર આવ્યા હતા, જેણે મામલો વધુ ગરમ કર્યો હતો. એક સભ્યએ આ અંગે બીસીસીઆઈને ફરિયાદ પણ કરી હતી. આ પહેલા ટીમ ઈન્ડિયાનું ઘરઆંગણે ન્યૂઝીલેન્ડ સામે શરમજનક પ્રદર્શન રહ્યું હતું. ન્યૂઝીલેન્ડે ભારતને ટેસ્ટ શ્રેણીમાં 3-0થી હરાવ્યું હતું.
