રાજકીય વિરોધ વચ્ચે, કર્ણાટક સરકારે મંગળવારે વિધાનસભામાં સરકારી કોન્ટ્રાક્ટમાં મુસ્લિમો માટે ચાર ટકા અનામત લાગુ કરવા માટે એક બિલ રજૂ કર્યું. કાયદા અને સંસદીય બાબતોના મંત્રી એચ.કે. પાટીલે કર્ણાટક જાહેર પ્રાપ્તિ પારદર્શિતા (KTPP) (સુધારા) બિલ રજૂ કર્યું.
કર્ણાટક કેબિનેટે શુક્રવારે કર્ણાટક ટ્રાન્સપરન્સી ઇન પબ્લિક પ્રોક્યોરમેન્ટ (KTPP) એક્ટમાં સુધારાને મંજૂરી આપી. આમાં, 2 કરોડ રૂપિયા સુધીના સિવિલ વર્ક્સ અને 1 કરોડ રૂપિયા સુધીના માલ/સેવાઓના કોન્ટ્રાક્ટમાં મુસ્લિમો માટે 4 ટકા કોન્ટ્રાક્ટ અનામત રાખવામાં આવ્યા છે. આ દરખાસ્તની જાહેરાત મુખ્યમંત્રી સિદ્ધારમૈયાએ ૭ માર્ચે રજૂ કરાયેલા ૨૦૨૫-૨૬ના બજેટમાં કરી હતી. ભાજપે કર્ણાટક સરકારના સરકારી કોન્ટ્રાક્ટમાં મુસ્લિમો માટે ચાર ટકા અનામત આપવાના પગલાને ગેરબંધારણીય ગણાવ્યું હતું. ભાજપે રદ કરવાની માંગણી સાથે કોર્ટમાં જવાની જાહેરાત કરી હતી.
મંગળવારે રજૂ કરાયેલા બિલમાં 2025-26ના બજેટ ભાષણમાં કરવામાં આવેલા પ્રસ્તાવને અમલમાં મૂકવા માટે KTPP એક્ટ, 1999માં સુધારો કરવામાં આવ્યો છે. આ બિલનો ઉદ્દેશ્ય પછાત વર્ગોમાં બેરોજગારી દૂર કરવાનો અને સરકારી બાંધકામ પ્રોજેક્ટ્સમાં તેમની ભાગીદારીને પ્રોત્સાહન આપવાનો છે.
આ બિલમાં અનુસૂચિત જાતિ, અનુસૂચિત જનજાતિ અને પછાત વર્ગો વચ્ચે 1 કરોડ રૂપિયા સુધીના મૂલ્યના કરારો માટે, સૂચિત વિભાગોમાં બાંધકામ કાર્યો સિવાય, માલ અને સેવાઓની ખરીદીમાં અનામતની પણ જોગવાઈ છે. આમાં, અનુસૂચિત જાતિના લોકો માટે 17.5 ટકા, અનુસૂચિત જનજાતિના લોકો માટે 6.95 ટકા, OBC ની શ્રેણી 1 માટે 4 ટકા, શ્રેણી 2A માટે 15 ટકા અને શ્રેણી 2B (મુસ્લિમ) માટે 4 ટકા અનામત આપવામાં આવ્યું છે.
હાલમાં, કર્ણાટકમાં અનુસૂચિત જાતિ (SC) અને અનુસૂચિત જનજાતિ (ST) માટે 24 ટકા, અન્ય પછાત વર્ગ (OBC)-શ્રેણી 1 માટે 4 ટકા અને OBC-શ્રેણી 2A માટે 15 ટકા અનામતની જોગવાઈ છે.
